កាលពីថ្ងៃអាទិត្យកន្លងទៅនេះ ខ្ញុំ និងមិត្តភក្តិមួយក្រុមបាននាំគ្នាធ្វើដំណើរទៅកាន់ខេត្តកំពង់ស្ពឺ ដើម្បីទៅជួបប្អូនៗកុមារ ក៏ដូចជានាំយកសម្ភារមួយចំនួនទៅជូនពួកគេនៅក្នុងអង្គការមួយឈ្មោះថា រួមដៃគ្នាដើម្បីផ្ដល់ក្ដីសង្ឃឹម។
អង្គការរួមដៃគ្នាដើម្បីផ្ដល់ក្ដីសង្ឃឹម ស្ថិតនៅក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ដែលចុះតាមផ្លូវលំប្រហែល ៤ គីឡូម៉ែត្រពីផ្លូវជាតិលេខ ៤។ អង្គការនេះត្រូវបានបង្កើតឡើងនៅឆ្នាំ ២០០៩ ដោយសប្បុរសជនក្នុង និងក្រៅប្រទេសក្នុងគោលបំណងផ្ដល់ឱកាសដល់កុមារដែលស្ថិតក្នុងគ្រួសារមានជីវភាពក្រីក្របានចូលរៀន។ សព្វថ្ងៃមានកុមារចំនួន ៦៤ នាក់កំពុងសិក្សានៅទីនោះ ហើយអង្គការក៏ផ្ដល់អាហារថ្ងៃត្រង់ដល់ពួកគេផងដែរ។
និយាយពីការធ្វើដំណើរវិញ ពួកយើងបានចាកចេញពីភ្នំពេញនៅម៉ោង ៨:៣០ ព្រឹក ហើយបានទៅដល់គោលដៅនៅម៉ោងជិត ១១។ ពេលទៅដល់ ពួកយើងបានជួបជាមួយក្មេងៗ លេងល្បែង និងច្រៀងចម្រៀងកុមារជាមួយពួកគេ។ បន្ទាប់ពីទទួលទានបាយថ្ងៃត្រង់រូមគ្នារួច ពួកយើងបាននាំគ្នាចែកអំណោយដល់ក្មេងៗ ដែលមានដូចជាអាវរងា កន្សែង និងស្រោមជើង ហើយបានប្រគល់គ្រឿងឧបភោគបរិភោគដែលមានដូចជាអង្ករ មី ទឹកស៊ីអ៊ីវ និងរបស់មួយចំនួនទៀតជូនអង្គការ។ ក្រោយពីនោះមានការសម្ដែងរឿងខ្លីមួយពីក្លឹបពន្លឺវឌ្ឍនៈ ជូនទស្សនាជាការកម្សាន្ត និងអប់រំផងដែរ។ នៅបញ្ចប់កម្មវិធី ពួកយើងបាននាំគ្នាដាំកូនឈើហូបផ្លែ និងនាំគ្នារាំលេងមុនពេលធ្វើដំណើរត្រលប់មកភ្នំពេញវិញ។
ជាចុងក្រោយ ខ្ញុំសូមអរគុណដល់អ្នកទាំងអស់គ្នាដែលបានចូលរួម ជាពិសេសបង សុខុមចៅយាយ ដែលបានប្រមូលគ្នីគ្នារៃអង្គាសថវិកា ក៏ដូចជាដើរទិញគ្រឿងសម្ភារ។ ខ្ញុំរីករាយណាស់ដែលបានចូលរួមក្នុងដំណើរនេះ ហើយសង្ឃឹមថានឹងមានឱកាសលើកក្រោយទៀត។
ប្រសិនបើលោកអ្នកមានបំណងជួយឧបត្ថម្ភជាសម្ភារ ឬថវិកាដល់អង្គការរួមដៃគ្នាដើម្បីផ្ដល់ក្ដីសង្ឃឹម សូមទាក់ទងលោក សត្យា តាមរយៈទូរសព្ទលេខ ០៧០ ៧៥៧ ២៧៧។
អានផងដែរ៖ ចំនែកមួយក្នុងជីវិត!
អីគេ ក្រែងថាចេញម៉ោង ៦ កន្លះហ្អី ?
បាទ មកពីមានបញ្ហាប្ដូរឡានទើបធ្វើឲ្យយឺតដូច្នោះ។
ស្មានតែនៅចាំគ្នាទាល់តែ ៨ កន្លះ