គណៈកម្មាធិការជាតិរៀបចំការបោះឆ្នោត (គ.ជ.ប) បានបង្ហាញគំរូសន្លឹកឆ្នោតមិនបានការចំនួន ២១ចំណុចដូចខាងក្រោម៖
១. សន្លឹកឆ្នោតមានខ្នាតតូចជាងសន្លឹកឆ្នោតផ្លូវការរបស់ គ.ជ.ប។
២. សន្លឹកឆ្នោតមានខ្នាតធំជាងសន្លឹកឆ្នោតផ្លូវការរបស់ គ.ជ.ប។
៣. សន្លឹកឆ្នោតបោះពុម្ពលើក្រដាសផ្សេង (ក្រាស់ជាង ឬស្ដើងជាង) ខុសពីសន្លឹកឆ្នោតផ្លូវការរបស់ គ.ជ.ប។
៤. សន្លឹកឆ្នោតដែលមានពណ៌ផ្សេងខុសពីសន្លឹកឆ្នោតផ្លូវការរបស់ គ.ជ.ប។
៥. សន្លឹកឆ្នោតដែលគ្មានឈ្មោះគណបក្សនយោបាយមួយ ឬច្រើនដែលបានឈ្មោះបោះឆ្នោតជ្រើសតាំងតំណាងរាស្ត្រ នៅតាមបណ្ឌលរាជធានី ខេត្តពាក់ព័ន្ធ។
៦. សន្លឹកឆ្នោតមានឈ្មោះគណបក្សនយោបាយលើសពីចំនួនគណបក្សនយោបាយដែលឈរឈ្មោះបោះឆ្នោតជ្រើសតាំងតំណាងរាស្ត្រសម្រាប់មណ្ឌលនីមួយៗ។
៧. សន្លឹកឆ្នោតបោះពុម្ពមានខុសឈ្មោះ ឬ/និងខុសលំដាប់លេខរៀងនៃគណបក្សនយោបាយឈរឈ្មោះបោះឆ្នោតជ្រើសតាំងតំណាងរាស្ត្រ សម្រាប់មណ្ឌលនីមួយៗ។
៨. សន្លឹកឆ្នោតក្លែងបន្លំ ឬក្លែងក្លាយដែលមានខ្លឹមសារមិនគ្រប់គ្រាន់ មិនត្រឹមត្រូវ ឬ/និងមានខ្លឹមសារផ្សេង មិនដូចសន្លឹកឆ្នោតដែល គ.ជ.ប បានបោះពុម្ពជាផ្លូវការ និងដែលមិនបានផ្ដល់ឲ្យដោយ គកប ពាក់ព័ន្ធ។
៩. សន្លឹកឆ្នោតគ្មានគំនូសសញ្ញាអ្វីទាំងអស់ (សន្លឹកឆ្នោតទំនេរ)។
១០. សន្លឹកឆ្នោតមានគំនូសសញ្ញាក្នុងប្រអប់បួនជ្រុងទ្រវែងនៃគណបក្សនយោបាយលើសពីមួយគណបក្ស។
១១. សន្លឹកឆ្នោតមានគំនូសសញ្ញាមួយ ឬច្រើននៅក្រៅប្រអប់បួនជ្រុងទ្រវែងនៃគណបក្សនយោបាយណាមួយ ទោះបីជាសន្លឹកឆ្នោតនោះមាន ឬគ្មានគំនូសសញ្ញាគាំទ្រក្នុងប្រអប់បួនជ្រុងទ្រវែងនៃគណបក្សនយោបាយក៏ដោយ។
១២. សន្លឹកឆ្នោតមានសរសេរពាក្យពេចន៍ ពាក្យអធិប្បាយ ឬឃ្លាប្រយោគផ្សេងៗ ទោះបីជានៅក្នុងប្រអប់ ឬក្រៅប្រអប់បួនជ្រុងទ្រវែងនៃគណបក្សនយោបាយណាមួយ ឬ/និងនៅលើផ្នែកខាងមុខ ឬខាងខ្នងនៃសន្លឹកឆ្នោតក៏ដោយ។
១៣. សន្លឹកឆ្នោតមានផ្ដិតស្នាមម្រាមដៃ ទោះបីនៅក្នុង ឬក្រៅប្រអប់បួនជ្រុងទ្រវែងនៃគណបក្សនយោបាយណាមួយ ឬ/និងនៅលើផ្នែកខាងមុខ ឬខាងខ្នងនៃសន្លឹកកឆ្នោតក៏ដោយ។
១៤. សន្លឹកកឆ្នោតដែលមានបិទតែម ឬក្រដាសប្រាក់ ឬក្រដាសបកបិទ ឬក្រដាសមានសំណេរ ឬរូបសញ្ញាផ្សេងៗ ភ្ជាប់នឹងប្រអប់បួនជ្រុងទ្រវែងនៃគណបក្សនយោបាយណាមួយ ឬនៅលើផ្នែកខាងមុខ ឬខាងខ្នងនៃសន្លឹកឆ្នោត។
១៥. សន្លឹកឆ្នោតមានឯកសារផ្សេងៗបិទ ឬខ្ទាស់ជាប់ជាមួយ។
១៦. សន្លឹកឆ្នោតមានសរសេរឈ្មោះ ហត្ថលេខា ឬសញ្ញាដែលនាំឲ្យគេស្គាល់អត្តសញ្ញាណអ្នកបោះឆ្នោត។
១៧. សន្លឹកឆ្នោតហែកដាច់បាត់លេខរៀង ឬប្រអប់បួនជ្រុងទ្រវែងនៃគណបក្សនយោបាយណាមួយ។
១៨. សន្លឹកឆ្នោតហែកដាច់ចេញពីគ្នាទាំងស្រុង។
១៩. សន្លឹកឆ្នោតដែលមានប្រឡាក់ពណ៌នៅផ្នែកខាងមុខ ឬ/និងនៅផ្នែកខាងខ្នងដែលមិនអាចមើលឃើញនូវរូបសញ្ញា និងអក្សរដែលត្រូវបានបោះពុម្ពនៅលើសន្លឹកឆ្នោត ឬ/និងគំនូសគំនូសសញ្ញាដែលបោះគាំទ្រគណបក្សនយោបាយណាមួយ។
២០. សន្លឹកឆ្នោតគ្មានបោះត្រាសម្ងាត់ផ្លូវការនៃការិយាល័យបោះឆ្នោតពាក់ព័ន្ធ។
២១. សន្លឹកឆ្នោតមានបោះត្រាសម្ងាត់ ប៉ុន្តែពុំមែនជាត្រាសម្ងាត់ផ្លូវការនៃការិយាល័យបោះឆ្នោតពាក់ព័ន្ធ។